有個好奇怪嘅50歲嘅女人，披頭散髮，個樣勁似Psyc Patient。佢話近排咳得好勁，咳到漏尿，要着成人尿片咁嚴重。講講吓發現佢幾年前已經喺公家醫院睇緊呢樣嘢。人哋嗰陣已經叫佢做 pelvic floor muscle exercise. 即係平時忍小便嗰個動作，重複做去段練個組肌肉，希望可以改善漏尿嘅情況。
問佢有冇做，佢話冇。所以而家情況差咗好多。佢話因為要持續做，覺得好麻煩，所以做咗一兩次就冇做啦。問佢係咪想要啲快靚正嘅方法，想做手術？佢又話人哋都提過，不過因為唔係100%保證會成功，所以佢唔會做手術。吹脹，醫學嘅嘢有乜嘢100%保證呢？唔驚你哋而家班投訴文化嘅茂利，告到我又六個月停牌啊？
總之你講親啲乜嘢，佢都話唔好/唔鍾意/唔想做。但係死都要繼續問你有啲乜嘢方法可以幫到佢。其實佢已經冇咳，又唔係尿道炎。叫佢排番個期睇公家，佢又唔鍾意。叫佢睇私家，佢又冇錢。咁阿姐，你想點？
我都想中六合彩10次，我都想含住金鎖匙出世，我都想我老豆係李嘉誠，我都想食極都唔肥身材永遠36-24-36，我想有隨意門唔使搭長途飛機，我想能夠時光倒流「芳芳可否不要老」，我想香港停留係90年代，飛黃騰達，樂壇盛放，聽番四大天王，繼續睇周星馳無厘頭嘅戲.....
咁係咪想就得啊？唔係吖嘛呀姐！有啲嘢煮到埋就食，有時都要接受現實，OK？ 你50歲人就已經要用尿片你都唔去正視下，我仲有啲乜嘢可以幫你？🤷🏽♀️
～～～
姑娘1煲俾我哋打邊爐後飲嘅菊花水。唱番首：「菊花台，為君開～～～～～」👨❤️👨
Search